азық-түлік пункті

(Продовольственный пункт)

әскери бөлімдер мен бөлімшелердің (командалардың) жеке құрамын және жеке әскери қызметшілерді ыстық тамақпен, азық-түлікпен, сумен қамтамасыз етуге арналған тұрақты штаттық немесе уақытша мекеме (бөлімше). А-т.п-нің құрамына қажетті қамтамасыз етуші жеке құрам, азық-түлік қорлары, тамақты және т.б. дайындайтын және тасымалдайтын жабдықтар мен мүліктер кіреді. Далалық жағдайларда А-т.п. батальондарда, дивизиондар мен бригадаларда (полктарда), олардың штаттық, тылдық бөлімшелерімен санитарлық жағынан қолайлы аймақтарда, жүруге ыңғайлы жолдары бар, жергілікті жердің жақсы қорғанышты және бүркемелі қасиеттері бар жерлерде жасалады. Қажет болған жағдайда олар инженерлік тұрғыда жабдықталады. А-т.п-тері әскери-автомобильдік жолдарда жол-коменданттық бөлімдердің (бөлімшелердің) күштерімен және құралдарымен жасалады. Темір жол станцияларында, порттарда, кемежайларда, әскери азық-түлік пункттері арнайы салынған үйлерде (құрылыстарда) немесе жабдықталған вагондарда (кемелерде) орналастырылып, оларды әскери қатынас жолдары органдары ұйымдастырады.